Cyfarfod â’r Ymddiriedolwyr

Mae’n fraint fawr i mi fod yn gadeirydd Meddylgarwch Cymru a chydweithio â’m cyd-ymddiriedolwyr anhygoel a’n rhwydwaith ehangach o gyfeillion i symud ymlaen â’n gweledigaeth o rannu meddylgarwch i gynorthwyo Cymru i ddod yn gymdeithas fwy ystyriol, yn fwy caredig ac yn fwy teg. Ym maes addysg mae fy nghefndir gan ddechrau yn athro a phennaeth a diweddu yn Bennaeth Strategaeth Plant a Phobl Ifanc yn Llywodraeth Cymru.

Fe wnes i hyfforddi i addysgu MBSR a MBCT ond nawr rwy’n canolbwyntio ar yr ystod o raglenni ysgafnach sydd wedi eu hanelu fwy at y boblogaeth yn gyffredinol. Addysg yw fy mhrif flaenoriaeth, gyda staff a disgyblion o bob oed ac rydw i’n gweithio gyda Phrosiect Meddylgarwch Mewn Ysgolion i hyfforddi staff ledled y byd sut i addysgu eu rhaglenni. Ar y cyd â Phrifysgol Derby rwyf hefyd yn cymryd rhan mewn addysgu Hyfforddi Meddwl Gofalgar i staff a disgyblion.

Mae hyn i gyd yn cyd-fynd yn berffaith â’n prosiect Meithrin Cymunedau Ystyriol ac rwy’n edrych ymlaen at ddarganfod rhagor am y meddylgarwch sydd eisoes yn digwydd ledled Cymru i’n hepu ni i blethu meddylgarwch drwy bob math o gymunedau.

Rwy’n falch iawn o fod yn un o ymddiriedolwyr sefydlol ac Ysgrifennydd Meddylgarwch Cymru ac yn rhan o’r tîm gwych hwn.  

Fe wnes i ddechrau ymarfer meddylgarwch yn 2009 pan roeddwn yn dioddef o orbryder ac yn chwilio am rywbeth i helpu. Roedd darganfod meddylgarwch yn rhywbeth mor bwerus fe wnaeth fy arwain i hyfforddi i fod yn athro. Ers hynny rwyf wedi addysgu dosbarthiadau MBSR agored yn y gymuned, ac wedi datblygu ac addysgu modiwlau Prifysgol ar feddylgarwch yn y gweithle. Rwyf hefyd wedi cydweithio ag awdurdod lleol dros gyfnod o flynyddoedd yn rhan o’i strategaeth i ddod â meddylgarwch i ysgolion, gan ddechrau gyda llesiant staff. Meddylgarwch yn y gweithle yw fy arbenigedd academaidd ac rwyf wedi cydweithio â sawl mudiad bach a mawr i gyflawni hyn.

Yn fwy diweddar mae meddylgarwch wedi fy helpu fi yn sylweddol i wynebu colledion arurthrol ac ymdopi â heriau cyflwr cronig a phrofedigaeth fawr.  

Ar nodyn ysgafnach, rwy’n barddoni ac yn perfformio fy ngwaith, ac yn mwynhau bod gyda fy nheulu a byw ar lan y môr.  

Helo, rwyf wrth fy modd cael bod yn un o ymddiriedolwyr Meddylgarwch Cymru. Mae gen i ddiddordeb mewn myfyrio/ ymarfer meddylgarwch ers 35 mlynedd. Therapydd Gwybyddol Ymddygiadol ydw i o ran galwedigaeth, ac rwy’n athro Dulliau sy’n Seiliedig ar Feddylgarwch. Ar hyn o bryd rwy’n gweithio i’r GIG yng Ngwent.

Rwyf hefyd yn ymwneud â meddylgarwch yma yng Nghymru gan gwblhau yn ddiweddar Graddfeistr drwy Ymchwil ym Mhrifysgol Bangor a chydweithio â’r Rhwydwaith Meddylgarwch ar gynllun arbrofol Rhaglen Hunan-Ofal Ystyriol i weithwyr y GIG. Mae gen i ddiddordeb arbennig yn y sector iechyd a llesiant.

Roeddwn yn athro mewn ysgol gynradd ac yn ddirprwy bennaeth cyn dod yn aelod seneddol yn 1997 a chyfnewid cloch yr ysgol am gloch y bleidlais. Bues yn aelod dros Ddyffryn Clwyd am 21 o flynyddoedd a chynorthwyo i drefnu gwersi meddylgarwch i 350 o wleidyddion a 800 o staff. Buon ni’n gyfrifol am gyhoeddi’r adroddiad seneddol Cenedl Ystyriol i ddefnydd meddylgarwch ym maes iechyd, ym maes addysg, ym maes cyfiwander troseddol ac yn y gweithle. Bues i’n cynorthwyo yn y Ganolfan/ Sefydliad Meddylgarwch yn Rhydychen am 9 mlynedd a bues yn gadeirydd Frazzled Cafe Ruby Wax am dair blynedd. Ar hyn o bryd rwy’n gadeirydd rhwydwaith rhyngwladol o hyrwyddwyr a gwleidyddion Menter Meddylgarwch, sydd yn ceisio cyflwyno meddylgarwch yn rhan o’u deddfwriaeth. Rwy’n falch o fod yn aelod o fwrdd Meddylgarwch Cymru.

Helo, Kate Tucker ydw i. Mae gen i gefndir proffesiynol yn therapydd iaith a lleferydd (TILl), yn ddarlithydd ac ymchwilydd. Yn ddiweddar fe wnes i gwblhau astudiaeth PhD yn archwilio datblygiad hunaniaeth broffesiynol myfyrwyr astudiaethau gofal iechyd, gan ganolbwyntio ar fyfyrwyr TILl. Mae gen i ddiddordeb arbennig mewn cefnogi datblygiad proffesiynol, gwytnwch a llesiant ym maes gofal iechyd. Rwy’n athro meddylgarwch achrededig gyda Breathworks ac rwyf wedi cofrestru gyda BAMBA. Rwy’n cynnal sesiynau meddylgarwch arlein drwy Meddylgarwch Cymru, hyfforddi llesiant a meddylgarwch i fyfyrwyr therapi iaith a lleferydd, ac rwy’n addysgu meddylgarwch yn fy milltir sgwâr ym Mhenarth. Rwy’n llawn cyffro i fod yn rhan o brosiectau sy’n cefnogi datblygu cymunedau ystyriol yng Nghymru ac yn cyflwyno meddylgarwch yn adnodd i gynnal llesiant.

Helo bawb! Am dros drideg mlynedd roeddwn yn athro mewn ysgol gynradd yn Rhondda Cynon Taf, ac am tua deng mlynedd rwyf wedi bod yn ymwneud â dysgu am feddylgarwch a’i rannu. Ar ôl treulio wyth wythnos ar gwrs meddylgarwch gyda Phrosiect Meddylgarwch Mewn Ysgolion, es i ati i hyfforddi i addysgu meddylgarwch i blant ac i staff yr ysgol. Bellach wedi ymddeol o fod yn athro, rwyf yn gweithio yn rhan-amser i elusen iechyd meddwl a llesiant, ac rwyf yn mynd i grŵp myfyrio yn wythnosol yn y Rhondda. Rwy’n hoffi ymlacio drwy wylio cerddoriaeth fyw, treulio amser ym myd natur a theithio yn ein fan dibynadwy o‘r enw Idris.

Roeddwn wrth fy modd cael gwahoddiad i ymuno â bwrdd ymddiriedolwyr Meddylgarwch Cymru, ac ar hyn o bryd fi yw ysgrifennydd y grŵp. Rwy’n edrych ymlaen at gefnogi nodau’r elusen mewn unrhyw ffordd y gallaf.

Helo, Natalie Snuggs ydw i ac yn ddiweddar rwyf wedi dod yn un o ymddiriedolwyr Meddylgarwch Cymru, ar ôl ymwneud â’r elusen am nifer o flynyddoedd. Yn dilyn cyfnod anodd gydag anhwylderau genetig a oedd heb gael diagnosis, dechreuais ddysgu am fyfyrio aꞌi addysgu dros dri deg pump o flynyddoedd yn ôl. Roeddwn iꞌn ei weld mor ddefnyddiol fel i mi gyflwyno rhai oꞌr technegau iꞌm gwersi ar ôl dod yn athrawes mewn ysgol gyfun a chyflwynais grwpiau myfyrio iꞌr staff amser cinio.

 Pan ddirywiodd fy iechyd ymhellach ac nid oeddwn yn gallu bod yn athrawes llawn amser, fe wnes hyfforddi ymhellach gydaꞌr British School of Meditation i ddod yn athrawes achrededig. Dyna pryd y darganfyddais sut y gall meddylgarwch fod o gymorth i gynnal iechyd yn ogystal ag ymdopi ag anhwylderau iechyd hir dymor. Es yn fy mlaen i gwblhau graddfeistr trwy ymchwil ym mhrifysgol Bangor, gan ymchwilio i fuddion rhaglenni tebyg i MBSR a MBCT i fenywod gydag anhwylderau syꞌn cael diagnosis yn hwyr, neu syꞌn cael diagnosis anghywir neu dim diagnosis o gwbl. Yn ystod y deng mlynedd diwethaf rwyf wedi canolbwyntio ar addysgu rhaglenni meddylgarwch syꞌn seiliedig ar MBSR, MBCT, BCL ac ACT, ac rwyf hefyd yn addasu rhain ar gyfer grwpiau gwahanol er mwyn creu rhaglenni syꞌn addas i bobl sydd yn well ganddynt ymagwedd llai ffurfiol. Yn ogystal rwyf wedi hyfforddi i addysgu Qigong i gael cynnal dosbarthiadau o symud yn ystyriol, gan fod hyn wedi bod yn hollbwysig iꞌm symudedd fy hun wrth i fy anhwylder ddatblygu. Rwyꞌn addysgu pobl o bob oed, o gyn-geni hyd at 100, gan gynnwys dosbarthiadau wediꞌu hadddasu ar gyfer y sawl syꞌn defnyddio cadair olwyn.

 Mae Meddylgarwch Cymru yn hyrwyddo llesiant pobl Cymru, yn ogystal â bod yn adnodd arbennig i athrawon ac ymarferwyr, ac rwyꞌn falch iawn o fod yn rhan oꞌr gwaith pwysig hwn. Rwyꞌn llawn cyffro i gael gweld pa lwybr byddwn yn ei ddilyn yn ystod y blynyddoedd nesaf.