“Dyw cerdded drwy’r coed ddim jyst yn seibiant; mae’n fy atgoffa fy mod i’n perthyn i rywbeth sy’n fwy na fi fy hun. ʺ (Gary)
Ers 2018 mae The Forest Bathing Institute (TFBI) wedi bod yn meithrin cymunedau ystyriol trwy gyflwyno sesiynau meddylgarwch ym myd natur o’r enw Forest Bathing (FB+) (Ymgolli mewn Coedwig), ac yn cynnal rhaglenni ymchwil arweiniol i’r math hygyrch hwn o feddylgarwch. Mae’r sesiynau yn cyfuno cerdded mewn modd feddylgar ag ymarferion anadlu, ymwybyddiaeth synhwyraidd a llonyddwch mewn mannau coetirol. Mae’r sefydlwyr, Gary ac Olga, yn esbonio:
‘Trwy gynnig ymarferion meddylgarwch ym myd natur sy’n seiliedig ar dystiolaeth ac sy’n hygyrch ac yn gynhwysol, rydyn ni’n helpu pobl i arafu, ailgysylltu â nhw eu hunain a meithrin bod yn ystyriol. Yn aml mae ein sesiynau yn creu profiadau mewn grwpiau cefnogol, gan annog cyfranogwyr i ddatblygu cysylltiadau parhaus â’i gilydd ac â byd natur.’
Mae safle’r TFBI yn sir Fynwy yn hyfforddi arweinwyr FB+ ar draws Cymru. Wedi ei leoli yn wreiddiol yn swydd Surrey, dros y blynyddoedd mae’r prosiect hwn wedi datblygu ac wedi ymledu ar draws y DU ac mae’n cynnig rhaglenni ymchwil a hyfforddi rhyngwladol. Mae TFBI wedi cyflwyno mwy na 1000 o weithgareddau a dosbarthiadau myfyrio a meddylgarwch, wedi eu harwain gan dîm amlddisgyblaethol o ymchwilwyr, pobl broffesiynol ym maes iechyd, ac arweinwyr ardystiedig ym maes ymgolli mewn coedwig. Yn ogystal mae wedi hyfforddi cannoedd o athrawon myfyrio ac arweinwyr ymgolli mewn coedwig sydd wedi cyflwyno miloedd yn rhagor o raglenni. Erbyn hyn nid yw’n bosibl cyfrif faint o bobl mae eu gwaith yn cyffwrdd ond mae hi’n bur debyg o fod yn ddegau o filoedd.
Yn ogystal â chyrsiau i’r cyhoedd ac atgyfeiriadau gan y GIG, mae TFBI yn addysgu cyrsiau myfyrio/ meddylgarwch ffurfiol i bobl broffesiynol sy’n gweithio ac yn addysgu ym maes iechyd, a mudiadau fel grwpiau cymunedol ac elusennau sy’n chwilio am raglenni llesiant. Maen nhw hefyd yn darparu gweithdai i fudiadau sydd am gyfuno ymarferion ystyriol ym myd natur â’u rhaglenni llesiant.
Ond ochr yn ochr â’r hyfforddiant ffurfiol mae Gary ac Olga, a wnaeth hyfforddi fel athrawon ioga yn India, yn pwysleisio pwysigrwydd gweithgareddau anffurfiol o feddylgarwch, gan gredu bod cyfuno’r ddwy ymagwedd yn cynnig buddion cyflenwol unigryw. Maen nhw’n angerddol dros wneud meddylgarwch ym myd natur yn hygyrch i bawb, beth bynnag fo’r oed, y cefndir neu’r gallu. Meddai Gary, ‘Yr hyn rwy’n garu fwyaf am ymgolli mewn coedwig yw ei bŵer tawel i dawelu fy meddwl a’m hailgysylltu â’r byd tu hwnt i sgriniau ac amserlenni. Mae wedi bod yn hynod o iachusol yn fy mywyd i – gan ostwng lefelau straen, codi fy ysbryd a fy helpu fi i deimlo’n fwy byw ac yn fwy synhwyrolꞌ.
Gary a Olga, sylfaenwyr TFBI
“Mae fel therapi ym myd natur – mae’n heddychlon, mae’n adferol ac mae’n sadio rhywun. ʺ (cyfranogwr)
Mae TFBI yn codi ymwybyddiaeth ac yn datblygu hyder cymunedol yn yr ymarferion profedig hyn trwy bartneriaethau â phrifysgolion i ymchwilio i fuddion iechyd yr ymarferion, gan atgynhyrchu ganlyniadau o Siapan. Mae astudiaethau yn dangos bod hyfforddiant meddylgarwch ym myd natur yn gostwng lefelau straen, yn gwella ansawdd cwsg a llesiant, ac yn cryfhau gwydnwch.
Yn 2021 roedd TFBI ar flaen y gad mewn astudiaeth ansoddol i archwilio’r berthynas rhwng ymgolli mewn coedwig a meddylgarwch. Roedd y canlyniadau yn dynodi bod pwyslais ymgolli mewn coedwig ar ganolbwyntio yn allanol yn gallu bod yn fynediad fwy pwyllog, fwy hygyrch i feddylgarwch, yn enwedig i unigolion sydd mewn perygl o ail-drawmateiddio, sy’n profi heriau iechyd meddwl dwys, neu sy’n cael mwy o drafferth ymgymryd ag ymarferion meddylgarwch eraill (Clarke, Kotera & McEwan, 2021).
“Rwyf wedi stryglo gyda gorbryder ers blynyddoedd, ond mae’r sesiynau hyn yn rhoi’r adnoddau i mi ymdopi. ʺ (Cyfranogwr)
Nod TFBI yw rhoi rhagor o gyfleoedd i gael mynediad i ymgolli mewn coedwig ar draws Cymru a’r DU drwy hyfforddi rhagor o arweinwyr ac integreiddio meddylgarwch ym myd natur â gofal iechyd, ag addysg, ac â llesiant cymunedol. Maen nhw’n parhau i weithio’n agos â phrifysgolion, â byrddau iechyd ac â phartneriaid rhyngwladol, ac maen nhw’n datblygu cysylltiadau cryfach â’r sector iechyd, â’r sector llywodraethol ac â’r sector addysg yng Nghymru. Maen nhw’n annog pawb sydd yn dod at feddylgarwch i roi cynnig arni ym myd natur, boed nhw’n dod ato o’r newydd neu â chefndir ym maes meddylgarwch, yn enwedig os ydyn nhw’n ei chael hi’n anodd ymarfer meddylgarwch dan do – mae nifer o gyfranogwyr TFBI yn ei chael hi’n haws o lawer ymlacio ac ymollwng straen. Mae yna lawer o awgrymiadau defnyddiol sut i ddechrau arni yn The Healing Power of Trees, llyfr newydd TFBI, ac yng nghardiau ymarfer FB+.
“Rwy’n teimlo’n dawelach fy meddwl ac yn ysgafnach fy ysbryd ar ôl pob sesiwn – fel petai fy mhryderon yn diflannu.ʺ
Manylion cyswllt:
E-bost: info@tfb.institute
Gwefan: https://tfb.institute
Facebook: https://www.facebook.com/profile.php?id=100063644529505
X (Twitter): https://x.com/TFB_Institute
Instagram: https://www.instagram.com/tfb_institute/
LinkedIn: https://www.linkedin.com/company/the-forest-bathing-institute/
Mae ein cyfraniad at ymchwil a adolygwyd gan gymheiriaid i’w weld yma https://tfb.institute/scientific-research/. Mae pedwar papur hyd yma. Ar hyn o bryd rydym yn gweithio ar bapur newydd gyda Phrifysgol Bournemouth, sydd wedi bod yn mesur gweithgaredd EEG; mae’r data cynnar yn gadarnhaol!
*Clarke, F. J., Kotera, Y., & McEwan, K. (2021). A qualitative study comparing mindfulness and shinrin-yoku (forest bathing): practitioners’ perspectives. Sustainability, 13(12), 6761.