“Rwyf eisiau gofalu am enw da meddylgarwch. Rwyf eisiau ei gyflwyno fel rhywbeth sy’n seiliedig ar dystiolaeth ac sydd â sylfaen ddofn ddeallusol, rhywbeth sydd o fudd pawb ym mhobman, rhywbeth a all gael ei ymarfer yr un mor rhwydd mewn archfarchnad neu mewn teml!”
(Andrew Lewis)
Gadawodd Andrew yrfa academaidd ac addysgol yn 1996, gan fynd ymlaen i hyfforddi fel nyrs seiciatryddol ac yn 2000 dechreuodd weithio yn y sector gwirfoddol. O oed ifanc roedd ganddo ddiddordeb personol, cynhenid ac ymarferol mewn meddylgarwch ac yn ystod ei amser fel nyrs seiciatryddol daeth o hyd i bob cyfle i gyflwyno meddylgarwch, myfyrio ac ymlacio i’r rhai roedd yn eu cynorthwyo. Roedd ei ymagwedd tuag ato yn deillio’n gryf o’i ymarfer ei hun ochr yn ochr â darllen ac astudio dysgeidiaeth Jon Kabat-Zinn, Robert Sapolsky, a Richard Davidson. Roedd yn seiliedig ar y cyrsiau MBSR sydd nawr yn gyfarwydd, sydd yn aml yn cael eu hargymell gan feddygon teulu; fodd bynnag yn ystod y cyfnod hwn nid oedd meddylgarwch eto yn boblogaidd.
“Wrth gwrs ei fod yn bwysig darllen, astudio, dysgu’r hyn mae eraill wedi ei ddarganfod ond ni ddylai hynny fod y cwbl sydd yna. Fy mhrif argymhelliad i bob amser oedd fy mhrofiad i, fy mywyd i, fy ymarfer i.”
Mae ymagwedd Andrew at feddylgarwch yn un seciwlar, yn un sy’n seiliedig ar wyddoniaeth ac yn un ymarferol, gan ofalu rhag defnyddio iaith amwys, ac yn mynnu bob amser nad therapi yw meddylgarwch.
Daeth yn glir i Andrew y byddai cynnig meddylgarwch yn well defnydd o’i amser, felly aeth ati i sefydlu ei wasaneth llawrydd ei hun, gan gael yr ardystiadau perthnasol yn 2016 ac mae heddiw wedi’i gofrestru o hyd gyda’r British School of Meditation. Ddeng mlynedd yn ddiweddarach mae ei waith yn rhoi llawenydd mawr iddo o hyd wrth iddo fod yn dyst i’r ymarfer drawsnewid nifer o fywydau.
“Rwy’n meddwl yn benodol am un person. Mae hi bob amser yn awyddus i ddweud wrth eraill yr hyn mae ymarfer meddylgarwch wedi ei wneud iddi hi. Mae ei thrawsnewidiad graddol wedi ysbrydoli ac mae ei pharodrwydd cyson i dderbyn o’r cychwyn cyntaf wedi bod yn eithriadol.”
Hyd yn hyn mae wedi ymweld ag ysgolion, ysbytai, cartrefi gofal, busnesau, meddygfeydd, clybiau chwaraeon, a grwpiau preifat unigol. Mae wedi dod o hyd i’w ‘gartref’ yng Nghanolfan Glyn Ebwy, canolfan gymunedol a diwyllianol ym Mlaenau Gwent, lle mae wedi cynnal sesiynau ddwywaith yr wythnos am yr 16 blynedd diwethaf. Mae Andrew yn cynnig cyrsiau MBSR, sesiynau unigol, grwpiau i ofalwyr, grwpiau i gefnogi pobl trwy brofedigaeth a cholled a chyrsiau i reoli poen. Yn ogystal mae’n ymateb i’r hyn sydd ei angen mewn sefyllfaoedd unigol penodol.
“Mae ymateb cleientiaid wedi bod yn anhygoel. Roedd hyn yn wir am y rhai â phroblemau cysgu, gorbryder, straen cronig, profedigaeth a hyd yn oed anhwylderau corfforol, a oedd yn aml yn gwaethygu pan o dan straen.”
Mae gobeithion Andrew am y dyfodol yn adlewyrchu’r symlrwydd sy’n sail i’w ymagwedd at feddylgarwch. Mae am barhau i’w hyrwyddo fel rhywbeth seciwlar, yn seiliedig ar dystiolaeth, ac yn bennaf yn rhywbeth ymarferol, gan sicrhau ei fod ar gael ac yn hygyrch i bawb. Tra ei fod yn cynnig gweithdai ambell waith mewn digwyddiadau llesiant, mae gwreiddiau ei ymarfer a’i galon yn ddwfn mewn ei wneud ar gael i unrhyw un ac i bawb mewn unrhyw gymuned. Mae Canolfan Glyn Ebwy yn fan cymunedol sy’n hyrwyddo hyn gyda’i bolisi drws-agored a rhyddid o unrhyw ddisgwyliadau, agenda neu ethos, dim byd ond caredigrwydd. Ei ddymuniad pennaf yw gweld rhagor o fannau tebyg i hwn lle gall pobl ddarganfod meddylgarwch a’i archwilio.
I gael rhagor o wybodaeth:
https://www.equanimity.wales/about