“Pe bawn i’n dewis tri gair sydd wrth galon fy ymarfer, llonyddwch, perspectif a chysylltiad fyddai’r rheiny.” (Catherine Waterfall)
Yn 2014, ymunodd Catherine â chwrs Meddylgarwch syꞌn Seiliedig ar Leihau Straen, yn y gobaith y byddaiꞌn lleihau ei gorbryder; roedd hyn ar ôl profi straen yn gysylltiedig â gwaith fel rheolwr-gyfarwyddwr a chyd-berchennog cwmni cyhoeddi. Roedd hiꞌn amheus ar y dechrau, yn ansicr a fyddai meddylgarwch yn gwneud gwahaniaeth i feddwl prysur a oedd yn gorweithio. Roedd yr hyn a ddarganfyddodd yn fwy pwerus o lawer: newidiodd y cwrs ei bywyd. “ Maeꞌn rhoi gofod i mi,”eglura. “ Maeꞌn galluogi i mi gael seibiant. Yn bwysicach fyth, maeꞌn fy atgoffa nad oes raid i mi gredu pob syniad pryderus syꞌn mynd trwy fy meddwl.”
Ddwy flynedd yn ddiweddarach, hyfforddodd Catherine fel athrawes meddylgarwch gyda Prifysgol Bangor. Erbyn hynny roedd meddylgarwch wedi dod yn fwy nag ymarfer i reoli gorbryder; roedd hi â diddordeb angerddol ynddo. Roedd hi eisiau helpu eraill a oedd yn delio â straen, â phwysau ac a oedd wedi eu llorio gan waith a chyfrifoldebau personol.
Roedd Catherine yn dyst iꞌr trawsnewidiad hwn mewn eraill trwy ei haddysgu gydag elusen iechyd meddwl yn Y Trallwng. Maeꞌn cofio un cyfranogwr yn cael cymaint o drafferth gydaꞌr sesiwn cyntaf o sganioꞌr corff fel ei bod yn ei dagrau ac wedi gwylltio gyda Catherine. Ond fe ddaeth yn ôl. Bedair blynedd yn ddiweddarach, hi yw un oꞌr rhai mae Catherine yn eu hadnabod syꞌn creduꞌn gryfaf o blaid meddylgarwch – syꞌn ein hatgoffa y gall newid ddechrau yn y mannau lle mae pobl yn teimlo fwyaf anghyfforddus.
Erbyn hyn, ei bwriad yw treulio o leiaf ugain munud y diwrnod yn myfyrio wrth eistedd, yn ogystal â phlethu meddylgarwch anffurfiol trwy fywyd pob dydd, yn enwedig mewn byd natur. Daeth cerdded, rhedeg, nofio a sylwi ar y byd oꞌi chwmpas i gyd yn gyfleoedd i ddod yn ôl at y presennol.
Yn ogystal mae enciliau ystyriol hunan-gydymdeimlad wedi ei dysgu i fod yn fwy caredig ac yn fwy addfwyn â hi ei hun. Er ei bod yn tueddu i ofidio a rhagweld y dyfodol, mae meddylgawrch yn ei helpu i nodiꞌr meddyliau hynny heb gael ei llorio ganddyn nhw.
Maeꞌr newidiadau wedi dylanwadu ar nifer o bethau yn ei bywyd. O ran perthynasau maeꞌn teimlo ei bod yn well am wrando: yn arafach i adweithio trwy godi gwrychyn a theimloꞌn rhwystredig, ac yn fwy cymwys i fod yn amyneddgar wrth ymateb. Yn gorfforol, mae rhedeg a nofio mewn ffordd ystyriol wedi ei helpu hi i ymgyfarwyddo âꞌi chorff.
Mae hefyd wedi newid perthynas Catherine â llwyddiant. Maeꞌn llai pwysig iddi lwyddo er mwyn llwyddo; mae hapusrwydd, bodlonrwydd, a chadernid mewnol yn bwysicach o lawer nag elwa yn ariannol na statws proffesiynol. Trwy ei hymarfer mae Catherine yn egluro ei bod wedi darganfod heddwch trwy lonydduꞌr corff aꞌr meddwl. Mae llonyddwch yn ei chadwꞌn gadarn yn y presennol ac yn dod â thawelwch iꞌw dydd.
Yn ogystal mae wedi sylwi ar newid perspectif syꞌn dod o arafuꞌr meddwl, gan roi cyfleoedd iddi sylwi ar feddyliau brawychus aꞌu gweld am yr hyn ydyn nhw, gweld problemau yn gliriach na thrwy phrism o ofn. Mae Catherine hefyd yn nodi iddi deimlo cysylltiad cryf ag eraill tra eu bod nhwꞌn myfyrio mewn grŵp, yn athrawes ac yn gyfranogwr fel ei gilydd. Mae cydymarfer yn aml yn ei gadael gyda theimlad o berthynas ag eraill.
Roedd yna adeg pan aeth Catherine o fod yn berson prysur, allanol-lwyddiannus, i rywun na allai agor ei gliniadur heb gael pwl o banic; pan oedd pwysau rhedeg busnes bellach wedi mynd yn ormod. Ni wnaeth meddylgarwch gael gwared â phob rhwystr, ond fe wnaeth drawsffurfio sut maeꞌn ymateb i straen. Maeꞌn dawelach ei meddwl, yn hapusach ac yn gallu ymdopiꞌn well â bywyd fel y mae.
Mae Catherine yn gwybod ei fod yn anochel y bydd rhagor o adegau anodd i ddod mewn bywyd ond maeꞌn credu y bydd ei bwriad o barhau i gael ffydd yn ei hymarfer yn ei helpu hi i ddelio â nhw gyda sadrwydd, gyda dewrder ac mewn modd ystyriol.
Dymuniad Catherine yw i feddylgarwch fod yn fwy cyffredin mewn cymdeithas, yn enwedig ymysg arweinwyr, cyflogwyr a phobl mewn awdurdod. Maeꞌn gwybod o brofiad mor anodd yw arwain ac mae eisiau datblygu rhagor o gysylltiadau yn y byd corfforaethol gydag arweinwyr busnes a rheolwyr. Mae gan feddylgarwch lawer iꞌw gynnig iꞌr rhai sydd â chyfrifoldeb: nid fel datrysiad sydyn ond fel ffordd ymarferol, ddynol i ddatblygu eglurder, gwydnwch a charedigrwydd.
Dechreuodd profiad Catherine gyda gorbryder ac amheuaeth, ond mae wedi datblygu i fod yn ymarfer gydol oes sydd âꞌi wreiddiau mewn llonyddwch, perspectif a chysylltiad. Dyna pam maeꞌn addysgu meddylgarwch: oherwydd maeꞌn gwybod sut maeꞌn teimlo i gael ei llorio, a hefyd maeꞌn gwybod bod ffordd arall o fyw yn bosibl.
Manylion Cyswllt:
Gwefan: http://www.good4mind.com/